د دوايي بازار د وضعیت د ارزونې او د سوداګرو د ستونزو د حل لپاره د همغږۍ غونډه ترسره شوه
محترم الحافظ ډاکټر نعیمالله ایوبي، د درملو او روغتیایي محصولاتو د تنظیم عمومي رئیس، د خوړو او درملو معینیت د درملو د برخې له رییسانو او د دې معینیت له متخصصینو سره نن سهشنبه، د ۱۵ شعبان ۱۴۴۷ هـ ق، د درملو او طبي تجهیزاتو د وارداتو د اتحادیې له مسئولینو او غړو سره د خوړو او درملو معینیت په تالار کې لیدنه او خبرې اترې وکړې.
په دې غونډه کې دواړو لورو د یو شمېر مهمو موضوعاتو په اړه بحث او د نظر تبادله وکړه، چې پکې لاندې برخو ته اشاره کوو: د افغانستان اسلامي امارت د عامې روغتیا وزارت او د بنګلدیش هېواد ترمنځ د تفاهم مقدمات د افغان سوداګرو لپاره د دوا واردولو په برخه کې د اسانتیاوو رامنځته کولو په موخه، د هېواد په دوايي بازار کې د ځینو وارداتي اقلامو د کمښت په اړه د راپورونو ارزونه، د دوا احتکار او د بیو د لوړوالي مخنیوی، د کاري پروسو چټکتیا، د درملیز پروفورمونو د صادرولو لپاره د اسانتیاوو زیاتوالی، او د روغتیایي محصولاتو د ثبت پروسې پیل.
د یادونې وړ ده چې د عامې روغتیا وزارت مشرتابه په خپلو وروستیو سفرونو کې له ګاونډیو او سیمهییزو هېوادونو سره مهمو توافقونو ته رسېدلي، چې کولای شي د پاکستاني درملو د بندېدو لپاره مناسب بدیل وګرځي.
