د خوړو او درملو ملي ادارې سرپرست د خوړو نړیوال پرګرام (WFP) مؤسسې له سرپرست رییس او مل پلاوي سره وکتل

د خوړو او درملو ملي ادارې سرپرست د خوړو نړیوال پرګرام (WFP) مؤسسې له سرپرست رییس او مل پلاوي سره وکتل؛
1445/09/4 هـ ق
د افغانستان د خوړو او درملو ملي ادارې سرپرست ډاکټر صاحب عبدالباري عمر نن پنجشنبه د روان 1445هـ ق کال د رمضان د میاشتې په 4نیټه په خپل کاري دفتر د خوړو نړیوال پرګرام (WFP) مؤسسې له رییس ښاغلي هارالد منهارت او مل پلاوي سره وکتل او د خوړو د خوندیتوب پر هر اړخیز بحث او خبرې وشوې.
د ناستې په پيل کې ښاغلي هارالد منهارت په افغانستان او نورو هېوادو کې د خپلو فعالیتو په اړه هر اړخیز معلومات له مقام سره شریک کړه او زیاته یې کړه هڅه کوي ترڅو افغانستان ته لا ډېر مرستې جلب کړو.
په ورته وخت کې د خوړو او درملو ملي ادارې لوی رییس هغوی ته د ښه راغلاست ترڅنګ په افغانستان کې د یادې مؤسسې له فعالیتونو او خدماتو مننه وکړه، ښاغلي عمر د خوړو او درملو ملي ادارې پر فعالیتونو او لاسته راوړنو رڼا واچوله او زیاته یې کړه چې یاده اداره د نورو دندو ترڅنګ د درملو، روغتیايي محصولاتو او خوراکي توکو د کیفیت څخه د ډاډ ترلاسه کولو دنده لري.
ښاغلي عمر د (WFP) مؤسسې له رییس څخه وغوښتل چې په خپلو چارو کې ټول خوراکي توکي باید د خوړو او درملو ملي ادارې د اصولو او قوانینو سره سم وپيرل او توزیع شي.
ښاغلي عمر یاده لیدنه کې د خوار ځواکۍ اصلي لامل بې کیفیته او غېر معیاري خوراکي توکي وبلل چې باید کیفیت او خوندیتوب ته جدي پاملرنه او کار وشي.
پر همدې مهال هارالد منهارت د خوړو ملي ادارې لپاره د یادې ادارې سرپرست فعالیتونه وستایل او ژمنه یې وکړه چې خوړو او درملو ملي ادارې د اصولو له مخې به خپل خدمات ترسره کوي.
ددغې ناستې په پاي کې پریکړه وشوه چې د خوړو او درملو ملي ادارې تخنیکي ټیم به د یاد مؤسسې له تخنیکي ټیم سره د یو شمیر موضوعات د حل په موخه ګډ کار وکړي.