د خوړو او درملو معین د یوې پلاوي په مشري د ایران اسلامي جمهوریت ته سفر وکړ؛
محترم الحاج مولوي حمدالله زاهد، د (ا.ا.ا) د عامې روغتیا وزارت د خوړو او درملو معین، د سهشنبې په ورځ د ۱۴۴۷ هـ ق کال د جمادالثاني د ۲۵مې نېټې سره سم، د یوې پلاوي په مشري چې د درملو او خوراکي توکو د ارزونې او ثبت رئیسـان، د معینیت تخنیکي سلاکاران او د وارداتي څانګو استازي پکې شامل وو، د ایران اسلامي جمهوریت ته سفر وکړ او هلته یې د ایران د روغتیا وزارت له معین او د دغه هېواد د درملو او خوړو د سازمان له رئیس محترم ډاکتر مهدي پیرصالحي او مل پلاوي سره لیدنه او خبرې اترې ترسره کړې.
په دې لیدنه کې دواړو لورو د تنظیمي او سوداګریزو اړیکو د پیاوړتیا، د تجربو د تبادلې، د تخنیکي همکاریو له لارې د دواړو ګاونډیو هېوادونو ترمنځ د تنظیمي سیستم د پیاوړتیا، د تنظیمي تفاهملیک د موادو د عملي کولو، د افغان کارپوهانو د ظرفیت لوړولو او هېواد ته د خوړو او درملو د وارداتو د بهیر د اسانتیا په اړه هر اړخیز بحث او خبرې اترې وکړې.
د یادونې وړ ده چې تر دې وړاندې د ایران اسلامي جمهوریت یو لوړپوړی پلاوی د دواړو هېوادونو ترمنځ د دوهاړخیزو همکاریو او هېواد ته د خوړو او درملو د وارداتو د بهیر د اسانتیا په موخه د خوړو او درملو په معینیت کې له اړوندو مسؤلینو سره لیدنه او خبرې اترې کړې وې.
