د عامې روغتیا وزارت د خوړو او درملو معینیت او د سوداګرۍ نړيوال سازمان (WTO) سره د ژمنو د همغږۍ غونډه ترسره شوه:
د عامې روغتیا وزارت د خوړو او درملو معینیت د ژمنو د تعقیب او همغږۍ غونډه د سوداګرۍ نړيوال سازمان (WTO) له مسؤلینو سره د ۱۴۴۷ هـ ق کال د جماديالثاني د ۲۶مې نېټې د چهارشنبې په ورځ ترسره شوه، تر څو د هېواد د سوداګرۍ لپاره په نړيوال مارکېټ کې اسانتیاوې برابرې شي. په دې غونډه کې د صنعت او سوداګرۍ او د کرنې وزارتونو استازو، د پلان او پالیسۍ عمومي ریاست استازو او د خوړو او درملو معینیت د درملو اړوندو څانګو مسؤلینو ګډون درلود. غونډه د خوړو او درملو معینیت د غونډو په تالار کې جوړه شوې وه.
د غونډې په پیل کې محترم الحافظ ډاکتر نعیمالله ایوبي، د درملو او صحي محصولاتو د تنظیم عمومي رئیس او د معینیت وارسی کوونکي، مېلمنو ته ښه راغلاست ووایه او د دغه ډول غونډو جوړول یې د هېواد د سوداګرۍ، په ځانګړي ډول د درملو او خوراکي توکو د صادراتو او وارداتو د اسانتیا لپاره ارزښتناک وبلل. نوموړي ګډونوالو ته د خوړو او درملو معینیت له لوري د رامنځته شویو اسانتیاوو او د صادراتي خوراکي توکو لپاره د روغتیايي تصدیقلیک د صادرولو په اړه معلومات وړاندې کړل او ټینګار یې وکړ چې د خوړو او درملو معینیت د سوداګرۍ نړيوال سازمان (WTO) د ټولو ژمنو رعایت ته ژمن دی.
وروسته محترم عبدالوکیل مسلم، د سوداګرۍ نړيوال سازمان (WTO) رئیس، د اړتیا وړ موضوعات د پرزنټېشن له لارې ګډونوالو ته وړاندې کړل.
