د پاکستان له هېواده د درملو د وارداتو د بندېدو په اړه د مرحلېوار تېرېدو د طرحې د لا ښه عملي کېدو په موخه د همغږۍ غونډه ترسره شوه:
د پاکستان له هېواده د درملو د وارداتو د بندېدو په اړه د اسلامي امارت د مشرتابه د هدایت د تطبیق په موخه، د مرحلېوار تېرېدو د طرحې د لا ښه عملي کېدو لپاره د خوړو او درملو معینیت کې د پنجشنبې په ورځ، د ۱۴۴۷ هـ ق کال د رجب د میاشتې په ۱۸مه نېټه، د درملو د خدمتونو ریاست، د درملیزو تاسیساتو د جواز ورکولو ریاست او د اسنادو د تحلیل او د فعالیتونو د تنظیم ریاست ترمنځ د همغږۍ غونډه ترسره شوه.
د خوړو او درملو معینیت د تخنیکي ناستو د ترسره کولو، له اړوندو ادارو سره د دوامدارې همغږۍ، د کورني بازار د وضعیت ارزونې، د موجودو زېرمو د مدیریت او له باوري هېوادونو څخه د بدیلو وارداتو د اسانتیا برابرولو له لارې هڅه کوي، څو د درملو د عرضې په بهیر کې د هر ډول خنډ مخه ونیول شي او وګړو ته د معیاري او باکیفیته درملو خوندي لاسرسی تضمین شي.
د یادو شویو ریاستونو مسوولینو او استازو ټینګار وکړ چې دغه طرحه باید په مرحلېوار او سنجول شوي ډول تطبیق شي، تر څو د درملیزو خدمتونو د وړاندې کولو بهیر اغېزمن نه شي او عامه ګټې خوندي پاتې شي.
د یادونې وړ ده چې د دې طرحې د تطبیق موده د روان کال د حوت میاشتې تر پایه پورې ده.
