په نامه د سبزومو تولیدي فابریکې پرانیستنه وشوه (TJL) د ۲۵ میلیونه ډالرو په ارزښت د
د ۲۵ میلیونه ډالرو په ارزښت د (T J L) په نامه د سیرمو تولیدي فابریکې پرانستنه وشوه.
تیر یکشنبه د روان ۱۴۴۵ هـ ق کال د ریبع الاول د میاشتې په ۱۶ نیته، کابل ولایت کې د ۲۵ میلیونه ډالرو په ارزښت (T J L) په نامه د سیرم تولیدي فابریکې پرانستنه د یو لړ ځانګړو مراسمو په ترڅ کې چې د افغانستان اسلامي امارت لوړ رتبه چارواکو پکې برخه اخیستې وه پرانیستل شوه.
د یادې فابریکې پرانست غوڼده کې د چارو ادارې لوی رییس محترم شیخ انورالحق انور یاد فابریکه د هیواد په اقتصادي برخه او د خلکو د سیرم د اړتیاو پوره کولو کې یو مهم ګام وباله، ښاغلي شیخ انورالحق انور زیاته کړه چې باکیفیته درملو او خوراکي توکو ته لاس رسی د هر افغان لپاره مهم دي او هیواد ته یې د بې کیفیته خوراکي توکو او درملو د وارداتو پر مخنیوي ټینګار وکړ.
په ورته وخت کې د خوړو او درملو ملي ادارې د درملو او روغتیايي محصولاتو معین ډاکټر رحمت الله روفي د هیواد ټولو وګړو ته د یادې فابریکې د مبارکۍ ترڅنګ وویل چې د خوړو او درملو ملي ادارې د درملو او خوراکي توکو صنعت کارانو ته پوره اسانتیاوې رامنځته کړي، او د تولیدي فابریکو د ملاتړ په موخه یې بازار کنټرول کړی او د ۱۵ قلمه هغو درملو ته به د وارداتو اجازه ورنکړي چې افغانستان پکې ځان بساینې ته رسیدلی ده، همدا راز ښاغلي روفي د وراداتو د برخې پر سوداګرو غږ وکړ چې د وارداتو پر ځای تر یوه حده په داخل کې تولیداتو ته مخه کړي.
د یادې فابریکې پرانست غونډه کې د صنعت او سوداګرۍ وزارت معین ښاغلي قدرت الله جمال وویل چې افغانستان د درملو د تولید په برخه کې د پام وړ پرمختګ کړی او په نږدی راتلونکي کې به د افغانستان سیرم یو شمیر هیوادونو ته صادر شي، ښاغلي جمال په بهر میشتو پانګوالو غږ وکړ چې افغانستان کې دې پانګونه وکړي او د هیواد له ټولو وګړو یې هم وغوښتل چې د داخلي تولیداتو څخه ګټه پورته کړي.
د یادونې وړ ده چې یاده فابریکه په لس جریبه ځمکه کې جوړه شوې، چې د ۲۴ ساعته په جریان کې د ۱۱۰ زره مختلف ډول سیرمو د تولید ظرفیت لري او په مستقیم او غیر مستقیم ډول یې ۷۰۰ نفرو ته پکې د کار زمینه برابره شوې ده
